方國珊「浴血」反堆填

【明報專訊】立法會財務委員會噚日繼續會議，雖然未審到「三堆一爐」撥款申請，但已有將軍澳區議員同居民到立法會門外示威，反對通過撥款申請。


當中，西貢區議員方國珊更加以道具血水，畀示威者淋上自己個頭，喻意「市民血濃於水」，反對政府以堆填區犧牲部分市民健康，政府唔應搞分化。


方國珊話，唔滿意政府漠視將軍澳居民意見，仲話有環保署職員長期喺堆填區工作後，因為癌病逝世咁講，質疑局方隱瞞堆填區影響市民健康。


環保團體綠領行動就將幾百個代表支持源頭減廢嘅藍色垃圾袋，喺政府總部外堆起，要求政府回應全面落實固體廢物按量徵費等訴求。


（盧翊銘攝）