財爺做DJ 1小時唔夠喉

【明報專訊】財政司長曾俊華近日「左右逢源」，噚日去港台出席「太陽計劃2014」中學文憑試放榜打氣大會，又去埋隔鄰商台為新節目《普選音樂》錄音做DJ，獨佔一小時air time，一邊播歌，一邊盡訴心中情。Emily聽聞財爺知道有得做DJ相當興奮，仲好似話想添食﹗


其實，財爺除咗鍾意睇戲之餘，亦好鍾意聽歌，平時早餐、晚餐、坐車返工、放工都會爭取時間聽音樂。1970年代，佢喺美國波士頓生活時，仲同幾個朋友組織樂隊夾band出show賺零用錢。財爺當年隊band叫「Sojourners」意思喺「浪子」、「過客」，財爺主要彈Rhythm結他，當年主要喺唐人餐館賣唱，隨口都唱得出一兩首歌神許冠傑嘅作品，《夜半輕私語》更加係唱到爛。


當年波士頓夾band

《普選音樂》將喺星期日下午3點播出，一共8集，除咗財爺，據聞仲約緊佔中發起人戴耀廷、立法會主席曾鈺成、平機會主席周一嶽同社民連主席梁國雄（長毛）等做主持。