會考5分 進修實戰 青年工作假期月掙6萬

【明報專訊】香港年輕人眼中理想嘅人工係幾多？今年25歲嘅Peter試過喺澳洲工作假期（working holiday）做餐館，薪金連津貼月入近6萬港元（底薪三萬二）。當然，高人工背後有好多辛酸史，就好似佢喺澳洲做中餐館，日做12個鐘，Peter話其實喺當地搵嘢做唔難，只睇你肯唔肯做。


「搵嘢做唔難 睇你肯唔肯做」

DSE下周一就放榜。話說以前會考得5分嘅Peter知道自己唔係讀書材料，佢讀咗兩年酒店服務管理高級文憑後，去咗四季酒店做廚房工作，一年半後因為表現好升做部長；之後被喺澳洲開中餐館嘅老闆賞識挖角，呢位老闆更專登飛過嚟同佢傾，Peter見佢咁有誠意，就跟咗佢去澳洲，以working holiday方式工作。


難得遇到好老闆，Peter待遇唔錯，一個月已有三萬二，老闆仲包食住，所以Peter基本上唔使出錢，但Peter話唔係個個好似佢咁好彩，「無做過餐飲嘅，過去做餐館實被人壓價」。做咗半年，Peter就轉咗去西餐廳做，一日返4個鐘，所以佢先有時間一邊做嘢一邊玩，真正working同holiday兼備。Peter已回港，現於米芝蓮餐廳工作。