SONY進軍動漫節 擬吸內地團

【明報專訊】一年一度嘅香港動漫電玩節就嚟舉行，又係一眾game迷出動之時，香港索尼（SONY）電腦娛樂（SCEH）將會首次喺電玩節亮相，噚日搞咗個優先體驗會。今年動漫節門票加價，但SCEH似乎冇有怕，佢哋嘅市場傳訊部助理總經理趙善盈話，大會估計內地人佔入場人數15%，自己就預測內地人消費會佔SCEH總銷售額30%，所以都諗緊啲計仔開發呢方面嘅商機，佢話同一本內地旅遊書傾緊，睇吓可唔可以包啲內地嚟嘅後生團入場喎。


今年門票貴5蚊

佢哋嘅新一代遊戲機PlayStation4出咗半年，喺全球賣咗超過700萬部，趙善盈話，佢哋喺電玩節會有啲未出嘅game畀人試玩，所以好有信心吸引到一眾發燒友，同埋銷情會好過之前亞洲遊戲展。「香港動漫電玩節2014」將會喺7月25至29號喺會展舉行，門票售價35蚊，比上年貴5蚊。