西九錄像平台《拾．年》

【明報專訊】「人生有幾多個十年？」西九管理局噚日開始網上啟動名為《拾．年》嘅互動錄像平台（yourdecade.hk），將香港120年（1889至2009年）嘅珍貴紀錄片，同本地電影內有關本港城市風貌片段結合，輯成10段每段約5分鐘嘅錄像精華，片段由香港電影資料館或政府檔案處等提供，例如有1989年民運紀錄片，又借用電影《去年煙花特別多》同《金雞2》嘅片段，回顧一下香港回歸同SARS等「集體回憶」。


借電影紀錄片回顧

其餘珍貴片段，有電影資料館至今收藏最早嘅香港影像﹕發明家愛迪生喺1898年拍攝嘅香港漁村風貌。講現代都市，就借用電影《警察故事》、《無間道》天台對決等經典電影。10段精華無字幕，由10個本地或海外音樂家為錄像譜上配樂。市民仲可以二次創作呢啲片段，剪輯成為自己心目中嘅香港影像，再儲存到網站同喺facebook分享。


負責項目嘅西九劇場發展主管劉祺豐話，香港近幾個月發生好多事，令人感觸良多，希望呢個項目可以畀青年加深認識香港歷史，搵出香港精神。此外，西九宣布本月26日黃昏5點半喺油麻地「榕樹頭」舉行「自由擺」，即場舉行3個鐘音樂同街舞節目畀市民免費欣賞。