網傳「遊行派錢」 民陣話畀唔起

【明報專訊】噚日網上開始流傳一個「7.1遊行派錢單」信息，內容詳列七一遊行當日嘅10個「派錢項目」，包括行頭排有$3,000、帶老人證有$100、帶小朋友加$300、上電視另加$1000等。今次遊行民陣聲稱有51萬人參與，警方就話高峰有9.86萬人參加，有網民計過，如果真係畀錢人遊行，主辦單位民陣今次最少都要派幾億元先夠！民陣召集人楊政賢就叫大家千祈唔好問民陣攞錢，因為民陣真係畀唔起。


稱搞遊行已花70多萬

唔知係咪發短訊嘅人習慣咗，幾隻字都用咗簡體字，楊政賢就笑言「係咪叫阿爺畀錢？」。講開錢，楊政賢話今次民陣七一遊行籌到43萬，但未計其他民間團體同政黨上繳籌款嘅錢。但佢話用咗70幾萬元搞遊行，點計都無可能派到錢請人嚟遊行啦。


有唔少網民就自己計可以收幾多，話自己喺後排、有著白衫同叫口號，共計2300元，仲強調有拍片證明，反問可以去邊度收錢。有人仲問係咪要上街或者去勞工處追欠薪"口添"。