女長毛投訴民署 部分成立

【明報專訊】特首梁振英去年搞咗3場地區諮詢會，落區同市民見面，其中一場喺跑馬地禮頓山社區會堂，「女長毛」雷玉蓮因為唔滿意民政總署當時嘅派籌同排隊安排，所以向申訴專員公署投訴，佢投訴總署無預先通知會以「派籌形式」派入場券，以及要求取得入場券嘅市民每次最多只可以離隊30分鐘，話會影響市民健康；申訴專員公署嘅調查結果話部分投訴成立。


女長毛今年1月向申訴署投訴，署方喺5月底展開全面調查，上周7月2號完成。對於女長毛投訴派籌安排，申訴專員話接納民政總署解釋，指當時係為咗確保秩序同公平才實行，所以呢個投訴不成立。


至於唔可以離隊30分鐘，申訴專員都認同民政總署應該延長離隊時間，指投訴成立。申訴專員話民政總署已經接納建議，日後有同類活動，會延長離隊時間至1小時或以上。