遊行「行得慢」籲齊自首

【明報專訊】噚日警方拉咗七一遊行嘅5個搞手，話佢哋嘅開路嘅貨車開得太慢，唔理警方警告，喺軒尼詩道停車，仲煽動遊行人士塞住路面。不過當日的確有好多人，而且行得好慢，連當日擺街站嘅藝人何韻詩都講：「當帶頭貨車來到我們街站時，整個街道已經堆滿了人，就我們前面10幾20米也花了兩三分鐘才成功呼籲大家移開讓貨車經過。」


200市民話參加

莫非行得慢都有罪？有網民質疑警方秋後算帳，不過都有人覺得警方實在「有理」，facebook下晝有人成立「齊認罪 我係51萬『行得慢』遊行人士之一」群組，到噚晚已經有超過5000人讚好，專頁負責人呼籲大家聽日（6日）下午3點著白色衫，一齊去自首：「有參與遊行的你，可能已經觸犯法例，身為一個良好市民，理應到警署自首，就讓我們星期日，集體到灣仔警署自首吧！」

目前有200幾個巿民話會參加，不過發起人講明要考慮清楚法律後果，叫大家唔好單獨行動，叫埋其他有遊行嘅朋友齊齊去就最好咁話。