呂明才校長 被屈「去咗遊行」

【明報專訊】七一啱啱過咗，呢兩日Emily有好多朋友傳來一條聲稱係「轉自黃潔蓮校長 （沙田呂明才小學）」嘅短訊，話「自己」去咗七一遊行，仲指摘主辦單位嘅開路貨車專登慢駛引起鼓譟，又話學民思潮誣衊警方刻意阻住遊行隊伍咁話。Emily噚日向黃校長求證，佢話「無去過遊行，亦無上載過任何文字，短訊完全唔係事實」。佢係返到學校有同事傳畀佢先至知，今次慘被冤枉。


呢條冒名短訊由七一開始瘋傳，Emily嘅前行家柳俊江仲收到唔止4次，連親子王國都有人轉載。除咗以上內容，又話立法會議員張超雄誣衊愛港力阻路，懷疑佢係美國派嚟攪局云云。


短訊指摘主辦方慢駛

不過，喺短訊中，呢個冒牌校長自稱「本來一心想盡一份力量參與遊行，向專制說不，想不到一些核心組織者有這樣的操守去顛倒是非，失望之餘，去到崇光便離隊」。其實黃校長之前支持開設國民教育科，今年七一啱啱獲頒行政長官社區服務獎狀，參加七一遊行，似乎唔係咁啱佢嘅性格喎。