麥記漢堡 連美國人都覺難捱

【明報專訊】港男要「尋找一個肯同自己捱麥記嘅女人」，呢個大型快餐連鎖店已經變成「捱日子」嘅標誌。原來唔單止香港人，連美國人自己都覺得麥記「好難捱」。美國有份「消費者報告」雜誌調查咗超過3萬個消費者，結果顯示最大型嗰幾間快餐連鎖店，竟然都係消費者最唔滿意嘅。


喺全美21個漢堡連鎖快餐品牌中，麥當勞嘅漢堡包以5.8分墊底，獲得最高分8.1分嘅漢堡，出自香港人唔係咁熟嘅品牌Habit Burger Grill。而炸雞連鎖店當中，肯德基嘅炸雞同麥記漢堡同等待遇，光榮位列倒數第一。


其實今年麥記同K記都不斷傳出食物安全問題，今次嘅評分或者係消費者忍受咗啲大型快餐店好耐之後，集體爆發不滿情緒。睇嚟大家對食物要求愈來愈高，追逐低成本嘅快餐巨頭，唔可以只顧住整靚個廣告啦，再唔改進下食物質素，分分鐘被新生代快餐取代。


[小琴密語]