民主之狗 陪主人「被捕」

【明報專訊】噚日凌晨警方喺中環遮打道清場，拉咗511人，咪住，好似數漏咗隻狗。噚日網上瘋傳，有一個女示威者嘅狗狗都被帶去黃竹坑香港警察學院，有網民封佢做「民主之狗」，話係香港開埠以來第一隻因為爭取民主而被捕嘅狗狗，亦有網民批評點解警方連狗都拉。


愛護動物組織批主人不負責

Emily搵咗其中一個被捕嘅社運人士，佢話隻狗想去廁所，警方話安排唔到，最後狗狗忍唔到就地解決，大小解一齊嚟，由主人自己清理番。該社運人士話，隻狗「淨係要屙嘅時候吠咗幾聲，其餘時間都好靜」。不過，愛護動物組織「貓朋狗友」幹事陳慧敏批評，示威者參加公民抗命就唔應該帶住狗狗，因為狗喺人多混亂嘅場面壓力好大，亦唔安全，認為主人做法不負責任。


警方用新咪 與學聯「對答」

另外，Emily聽聞，警方為咗今次清場行動買咗個新喇叭，噚日凌晨在場指揮官就係用呢套系統警告示威者。Emily又發現，指揮官好似電台主持咁，用個新咪同學聯個主台「你一句、我一句」，當學聯批評警方用過分武力，指揮官就回應話警方絕對唔會使用過分武力。