回應遊行 吳亮星：繼續服務

【明報專訊】前日七一遊行隊伍中，市民除咗有反對國務院白皮書內容，反對新界東北前期撥款亦係另一訴求，當中唔少人話係不滿立法會財委會主席吳亮星（星爺）主持審批過程嘅「獨特作風」。噚日喺立法會「星爺」就被多次追問點睇七一遊行，以及市民上街關唔關佢事，星爺多次迴避問題，被追問到第四次就吐出一句話，佢會「繼續服務」。


被追問4次吐4字

星爺噚日被四度追問點睇七一遊行人數，早上佢話自己要去開會唔答問題住，中午就話要去食飯，食完飯後話遲啲先答，至傍晚立法會流會，星爺再踏出會議廳，星爺仍然「守口如瓶」，面對傳媒蜂擁追問先吐出幾個字。


2003年大遊行後，自由黨田北俊唔支持23條立法，唔少人都好關注自由黨對今次遊行有咩回應。黨魁田北俊話佢哋唔係今次政改關鍵，如果政改方案無泛民支時，就算自由黨支持都唔會過到，所以今次壓力無咁大。


講開田少，佢噚日就喺facebook上載今年初喺沙田拜車公嘅相，留言話「如果求神可以令到香港同以前沒有思歪的日子一樣」，佢年初拜神時應該誠心啲喎。至於田少口中嘅「思歪」所指何人，係唔係特首梁振英（CY）？田少話大家各自表述啦！