CY舉雞蛋仔喊愛港被噓

【明報專訊】早排特首梁振英（CY）二女梁齊昕"界刂"手，仲同傳媒講被老竇逼去英國海德公園影家庭照；噚日CY走咗去維園出席活動，心情唔錯，周圍同人握手，即使被市民「噓爆」都笑笑口。而噚日有超過3000名年輕人「整餅」，參加藝人謝霆鋒主持嘅美食節目《12道鋒味》，同香港青年聯會舉辦嘅「齊撐香港創紀錄」，一齊整Emily細個最鍾意食嘅「雞蛋仔」（詳見C4）。

數千人同謝霆鋒齊整餅

不過CY就無份「整餅」，最後先至到場。3008個年輕人同謝霆鋒、陳奕迅（Eason）、民政事務局副局長許曉暉已經手持雞蛋仔，砌好「H?K」字樣。CY行埋去中間，好風騷咁同霆鋒同Eason握手，又圍住心心一圈同群眾握手，之後講嘢。不過因為落雨，嗰支咪唔多聽話，Emily淨係聽到CY話「雞蛋仔，是香港的集體回憶」。

CY：雞蛋仔是集體回憶

之後CY突然高呼「我愛香港！」，仲喺霆鋒手上接過雞蛋仔，高舉影相，但被全場「噓爆」，CY唔介意，仲笑笑口。不過佢無答傳媒提問就急急腳走咗。

另外，無綫前主播黃大鈞就喺facebook貼咗幅相，話「會展寵物展最新產品，『唔係梁振英』狗玩具，最適合大狗細狗攞來咬！」一隻盛惠$68.9。