綠葉製藥冧芬佬 一人一個小米盒子

【明報專訊】近期新股一筐筐，為咗喺眾多競爭者中突圍而出，個個新股都絞盡腦汁冧投資者開心。集資60億、近兩年最大隻醫藥新股綠葉，聽聞就為噚日參加投資者推介會嘅芬佬準備咗一人一個小米盒子當紀念品，唔知係唔係鼓勵大家追世界盃呢？


新股上市最簡單嘅就係自家產品當紀念品，好似鴻福堂（1446）送龜苓膏、鹹金桔，都市麗人（2298）送下居家服。唯獨醫藥股麻煩啲，因為好難送一盒心血管藥給投資者，而綠葉就幾靈活，趁住小米嘅品牌香港愈來愈多人識，送小米盒子真係都幾有噱頭。


小琴聽講，呢個主意其實係綠葉嘅財經公關建議嘅，而且並非首次，響舊年年底，當時嘅零售新股富貴鳥（1819）亦都有送小米盒子給投資者。不過，小琴就唔知佢地有冇提醒下投資者，響香港用小米盒子越獄（利用內地嘅IP地址）免費睇世界杯直播係有機會犯法，TVB會嬲架。


email: piano@mingpao.com

[小琴密語]