李偲嫣絕食 網民旁邊「野餐」

【明報專訊】正義聯盟召集人李偲嫣前日開始「絕食抗暴力」，除咗引起大批網民關注，有人去到政總外野餐「支持」佢無限期絕食，經民聯立法會議員梁美芬同民建聯蔣麗芸都有去「探班」打氣。李偲嫣仲話有唔少市民專誠探望佢，見到佢捨己為人而感動落淚。


網民捐帛金 李：唔會死

有網民聲稱捐咗50,001元為李偲嫣成立「李偲嫣神召基金」 ，話如果李不幸因為無限期絕食而身故，可以當做帛金。李偲嫣就話「大家客氣啦」，佢有一個盟友從事殯儀業，可以打點白事，唔需要大家操心，李偲嫣仲強調「信天有眼」，唔會畀佢死。


對於有人翻舊帳，話2012年反國教科事件中，有學生同家長發起絕食行動，李偲嫣當時同《文匯報》講「絕食之風不可長」。李偲嫣噚日反駁話兩個絕食性質唔同，佢無逼政府，亦無煽動人參加。