熊貓明報出沒

【明報專訊】最近來港嘅1600隻紙熊貓「快閃」巡迴過唔少香港地標，大受市民歡迎，噚日紙熊貓應約閃到《明報》編輯部，迷倒Emily同平日相當「矜持」嘅一眾同事。話說50隻紙熊貓原定下午4點半抵達，但有人提早大半小時就喺電梯大堂霸好位恭候大駕，就連其他樓層部門嘅同事都聞風而至，一度要「疏散人群」。


紙熊貓大軍一出現，眾人即蜂擁向前舉機，人潮塞爆編輯部大堂，有企得後嘅同事不禁大叫「（熊）貓尾都睇唔到」，可見場面幾咁壯觀，大家爭住抱走熊貓影合照，亦有同事幫熊貓戴上代表撐新聞自由嘅藍絲帶。主辦單位工作人員都不禁話，明報員工嘅狂熱，喺眾多紙熊貓去過嘅機構中數一數二！


今起結束快閃

紙熊貓行程密麻麻，噚日就去咗8個地方，《明報》係第五站，今日起會結束「快閃」，進駐終點站中環「PMQ元創方」1個月。主辦單位話，1600代表全球野生大熊貓僅存數目，希望藉此宣傳保育意識，而前日澳門大熊貓「心心」病逝，主辦單位都覺得好可惜。