李偲嫣絕食 寫定「絕筆」

【明報專訊】泛民政黨早前為爭取普選絕食，正義聯盟召集人李偲嫣都嚟呢一套。立法會發生衝擊事件，李偲嫣批評政府同警方縱容暴民，所以佢噚日喺政府總部外紮營，宣布開始絕食，直至政府聽市民心聲，回應點樣嚴正執法為止。佢表明絕食無期限，會堅持到身體抵受唔住為止，其間只會飲水，亦會照常返工，更呼籲陳日君樞機、佔中發起人戴耀廷等人一齊絕食喎。


網民翻舊帳﹕李曾指摘絕食

李偲嫣先後喺facebook寫咗一篇絕食宣言同一篇「偲嫣絕筆」，講吓佢絕食嘅因由，當中提到「我不會使用暴力，也不想煽動其他人使用暴力，我只有一條性命，我願意用我這條性命去向全香港市民提出我的希望」，話希望絕食可以感染暴力者放下暴力，停止佔中、停止圍攻立法會，更加表明「一天他們仍然使用暴力，一天我的絕食行動是不會停止，直到我的生命完結」。


李偲嫣話「對香港的愛」所以犧牲自己，但有網民就同佢翻舊帳，話佢2012年曾批評學民思潮以絕食反國教科時講過，「絕食之風不可長」、「用健康作武器」，絕食係博社會同情！泛民人士上次爭普選絕食16日，唔知偲嫣嘅愛，可以撐到幾耐？