無得投票 小妹妹哭紅了眼

【明報專訊】噚日係佔中全民投票首日擺實體票站，有唔少人都係一家大細去投票。「佔領中環」就喺facebook分享咗一個小妹妹因為無得投票而喺票站大哭嘅故事，妹妹仲話﹕「我喺學校都可以投票，投『反斗車王』做組名，點解我家無得投？」唔少網民都話，既然小朋友都出聲想投票，成年人就更加要行出來。


佔中喺facebook話一名爸爸帶小女兒去票站投票，當票站義工同佢講小朋友唔可以入票站投票時，妹妹就即刻喊，楚楚可憐咁問﹕「點解我無得投票？」

學民仔現身宣傳 愛港力誤當投票

講起投票資格，「未夠秤」嘅學民思潮召集人黃之鋒同發言人周庭，噚日陪同啱啱夠18歲嘅發言人劉貳龍，去銅鑼灣教協票站投票。3人現身票站時，一眾愛港力成員就大叫「你哋未夠秤，點解去投票」，並質疑投票無公信力。但其實黃之鋒同周庭只係去宣傳學界方案啫。


噚日票站有唔少政界、娛樂界人士發聲。歌手龍小菌同商業電台首席智囊陳志雲都現身理工大學票站投票，陳志雲話要向網絡暴力說不，又話「民意嘅表達談何非法」。陳志雲認為投票雖然無法律效力，但有政治意味，家有咁多人投票，相信政府唔會坐視不理。藝人黃耀明、何韻詩都有去票站，支持佔中投票。