告別消防一哥 記者要等等

【明報專訊】噚日係消防處長陳楚鑫榮休會操，雖然無邀請記者，但Emily一早收到風，早15分鐘到，點知消防處就無開門畀記者，話預備緊記者位。其間有位老人家話自己係周先生，門口阿sir唔知佢係邊位，就叫佢由正門入，周先生話自己行唔到咁遠，仲話本來知道有位泊車，嚟到先知無，好「fed-up」，叫佢同處長講，如果唔畀佢入，佢就唔去喇。


拒開門話預備緊 記者焗淋雨

後來呢位周先生話自己係「周湘農 BBS」，原來係銅紫荊星章得主，消防處當然畀佢入，可憐Emily同一班「乜星」都無嘅記者就要喺門口淋雨。


星級嘉賓企門口「好fed-up」

等咗15分鐘，Emily終於入到去，但全場要企「豬欄」，新聞官仲話完咗場要即刻走。處長榮休都吸引唔少其他紀律部隊「大sir」到賀，跑保安beat嘅Emily當然想同各位大sir打招呼，傾吓偈，但係消防處新聞官就話會操後嘅酒會係私人聚會，唔畀Emily入。Emily就覺得處長榮休係開心事，但咁嘅採訪安排，記者就唔多開心。