孔令成接掌海洋公園

【明報專訊】做咗11年海洋公園董事局主席嘅盛智文 （Allan Zeman）無得留低，政府噚日宣布，由現任董事局副主席孔令成接捧，但Allan之前同傳媒透露過想連任，加上海洋公園正值擴建水上樂園同新酒店嘅非常時期，唔少人質疑點解「叮走」Allan。


盛智文話過想連任

商務及經濟發展局長蘇錦樑就話Allan在任期間，海洋公園每年人次由唔夠300萬增長到舊年770萬，好感激佢嘅貢獻，但係董事局嘅繼承好緊要，覺得係合適時機轉主席人選喎。


孔令成「升呢」做海洋公園主席之後，政府再任命本身係董事局成員嘅華置主席劉鳴煒接任副主席，又加入咗兩個新董事，分別係信和置業執董黃永光、康泰旅行社董事總經理黃進達，至於加入海洋公園董事局6年嘅太古旅遊董事總經理梁志群就即將卸任。


海洋公園噚日發新聞稿，話新任主席孔令成將會邀請新一屆董事局，考慮畀Allan以榮譽顧問身分，繼續參與大樹灣水上樂園發展項目督導小組嘅工作，等佢可以繼續服務海洋公園。