居英港人首相府爭普選

【明報專訊】政改爭拗熾熱，國務院發表嘅白皮書又引發港人擔心高度自治不再，住喺倫敦嘅港人黃先生，日前就趁國務院總理李克強訪英、同英國首相卡梅倫會面時，拎住寫有「香港前途香港自決」示威牌，到首相府外抗議，要求中央畀港人直選特首同立法會議員。但係示威區同首相府外相隔大馬路，加上有太多其他示威者，相信李克強睇唔到佢。


黃先生喺英國從事移民及國籍法律工作，2012年香港有市民反對國民教育科時，佢都喺倫敦發起500人到香港駐倫敦經濟貿易辦事處門外示威。佢覺得近年中央對香港收緊政策，違反當年《中英聯合聲明》一國兩制嘅承諾，近排出嘅白皮書更係火上加油，令佢不得不企出來。佢仲話，英國作為聯合聲明締約國，對香港仲有道義同責任，所以佢特登帶埋支港英旗去，希望叫英國幫手爭取香港自決命運。