聯網總監雷操奭 籲年輕醫生勿計較

【明報專訊】2010年出任九龍東醫院聯網總監嘅雷操奭（粵音讀「式」）醫生月底退休，結束醫管局20多年工作，退休後會同太太坐郵輪去地中海歎吓世界。臨別秋波，佢提醒啲掛住夠鐘就收工嘅醫生，做醫生唔可以太計較，把握機會喺最短時間見識各種病。


退休遊埠 返港兼職行醫

雷操奭坐完郵輪返嚟之後，會到醫管局做醫院規劃工作，以兼職形式一星期返3日，再撥一日到公立醫院當麻醉科醫生。Emily笑佢退而不休，佢話以後唔使再接緊急電話。


雷醫生話公立醫生人工比其他專業其實唔算低，只係私家醫院人工實在太高，挖走晒啲年輕醫生。剛畢業嘅公院醫生起薪有5萬元，其他大學畢業生只得萬多元，咁高人工其實已計埋工時會長啲，份工係hard work。


佢認為年輕醫生應該學好醫術，盡量把握機會喺最短時間見識各種複雜病例。有啲年輕醫生掛住爭取夠鐘就收工，即使遇到難得一見嘅複雜手術，都唔願意超時工作，較注重工作與生活平衡，但雷醫生認為專業人士不可太計較。


雷醫生1981年喺澳洲悉尼大學醫學院畢業，做過小鎮醫院，又試過喺澳洲嘅醫院工作時，由星期五至下個星期一連4日要on call。回顧工作，最難忘係喺明愛醫院做顧問醫生，遇上警員朱振國被匪徒刺傷頸部大動脈，朱負傷追賊失血過多心臟曾經停頓，佢幫朱插喉時有啲困難，睇見當年後生嘅佢，雷話真係可惜。