電台訪問示威者 陳鑑林鬧港台「美化」暴力

【明報專訊】傳媒報道上周五立法會衝擊事件，搵各方人等評論作平衡報道係好正常嘅事，但民建聯陳鑑林就借事件乘機鬧香港電台「美化」暴力。噚日工聯會鄧家彪、民建聯葉國謙與李慧琼、工黨張超雄分別就上周五事件提出4條緊急質詢。陳鑑林借題發揮，話港台喺衝擊事件發生後，唔單止無譴責暴力行為，反而邀請「涉嫌搞事」嘅議員助理上電台接受訪問，係「美化」暴力行為，令暴力行為更肆無忌憚。


不過，港台發言人回應話，港台作為一個公共廣播機構，要提供平台畀社會大眾發表意見，而港台一直朝呢個方向做，唔覺得有咩問題。其實，陳鑑林只講到故事嘅一半，因為港台當時亦有邀請立法會財委會主席吳亮星出席節目，並非只聽一方意見。


同一節目有邀吳亮星

噚日4條緊急質詢一講就講咗兩個半鐘頭，以建制派議員發言居多，唔少都表示怕周五離開立法會時受到示威者滋擾，想政府交代聽日大會若遇上衝突，佢哋點樣先可以安全返屋企。