畫家拍賣華叔墨寶 捐非牟利團體

【明報專訊】已故支聯會主席司徒華生前常常寫書法，留下唔少墨寶，即將有一幅華叔嘅作品拍賣。


Emily心諗，如果自己有華叔墨寶就唔會賣，點解呢名擁有者會拎出嚟拍賣？負責拍賣嘅普藝拍賣副總裁莊志崗話，擁有者係一名年長嘅本地女畫家，無兒無女，擔心過身後，華叔墨寶會被人當垃圾棄置，決定將墨寶拍賣，畀有心人保管，拍賣所得捐畀非牟利團體；仲有，喺拍賣之前，可以畀多啲市民透過預展睇華叔墨寶。莊志崗話，佢唔可以公開受惠團體係咪支聯會或者六四紀念館。


至於點解呢名女畫家有華叔墨寶，原來佢喺2004年農曆新年，喺牛頭角街頭遇到為街坊寫揮春嘅華叔。當時佢係第一次見華叔，就請佢為自己書齋「聚恩堂」寫一幅字，華叔一口應承，更特意返屋企用一晚完成作品。


街頭寫揮春 邀為書齋題字

莊志崗形容呢幅墨寶保存完整，狀態「完美」，華叔嘅書法、構圖都好，加上可能有華叔支持者加入競投，過往曾經拍賣華叔對聯，成交價去到8000至1萬元。Emily希望多啲人加入競投，籌多啲錢畀非牟利團體。