林新強英文答愛國 唔肯用中文重複

【明報專訊】律師會選出新一屆會長同副會長，成功連任嘅會長林新強噚日同傳媒聚會。話說林新強月前喺記招講政改時，唔肯用英文重複回應提問，一度喺網上爆紅，被人質疑佢英文唔掂；噚日林會長有備而來，對住英文問題從容不迫，原來佢英文唔差，不過林會長真有性格，今次用英文答完法官愛國嘅問題，就唔肯用中文再答。最後副會長蘇紹聰喺林會長耳邊講咗一句「要答」，林會長先從善如流，用中文重複答案。


副會長提醒後改變主意

國務院上星期發表有關一國兩制實踐白皮書後，大律師公會翌日出聲明反駁咗幾點，反觀律師會就一直未有回應。據聞律師會內部想發聲明，但一直等林會長決定，但林會長噚日就無回應內部係咪曾經有人提出發聲明，只係話內部事情唔想透露畀「全世界聽」。


南海主權都有講

林新強除咗大力推銷國務院白皮書係一份重要文件，最令Emily意想不到嘅係，林會長連南海主權問題爭議都講埋。話說前排越南嘅律師會同香港律師會就南海主權問題上互發聲明對論，林會長澄清，當日發聲明只係重申南海主權問題屬外交層次，又話維護國家統一領土完整、保持香港繁榮穩定係每個香港中國公民嘅責任！