會展淡季檔期仍滿

【明報專訊】香港4月份零售總額跌成10%，又話內地客消費力減弱，嚇到大家騰騰震，擔心影響香港經濟增長；不過會展業方面又似乎唔錯喎，會展管理公司噚日公布咗5月份會展中心嘅表現，包括亞洲區國際葡萄酒及烈酒展覽會、巴塞爾藝術展等等，成個月舉行大大小小活動76個，接待咗近43萬全球訪客，真係日日爆滿咁話。


會展管理公司總經理Monica（梅李玉霞）仲同小琴講，淨係藝術展同酒展嘅訪客已經比上一屆增加近一成，嚟得呢兩個展嘅都係國際高消費力人群，佢地淨係響會展嘅餐飲消費就已經比上屆多咗20%，證明會展業對香港商務旅遊嘅貢獻並冇受零售倒退影響。


Monica仲話，以往5月都係會展淡季，但呢幾年喺租金優惠等等嘅策略下，淡季檔期都排得滿滿，公司仲因此要額外請多12萬臨時人手，可見會展業發展潛力，無論對本港就業同經濟都有幫助。