袁彌明被捕 話蔣麗芸恐嚇

【明報專訊】新界東北發展嘅爭議，由立法會會議廳燒到落立法會停車場，話說人民力量主席袁彌明（Erica）喺上星期五立法會財委會暫停會議後，喺立法會停車場被指用車擋住幾個建制派議員，事件驚動警方介入。Erica噚日喺律師陪同下去咗灣仔警察總部「協助調查」，結果被警方以涉嫌「妨礙議員離開立法會」罪名正式拘捕，以500蚊保釋外出。


進入司法程序 蔣不評論

Erica話，錄口供時答案只有一個﹕「我保持緘默，如果佢哋足料就起訴我啦。」Erica話喺當晚嘅錄影短片見到，佢前面3個閘全部落晒，佢都出唔到去，無阻到人，話今次係政治檢控。


Erica噚日被拉嘅同時，亦喺警署報案，告民建聯蔣麗芸刑事恐嚇同刑事毁壞，仲話當晚蔣麗芸喺停車場同佢講﹕「你知唔知我邊個呀？」佢又話有一名司機警告佢，若困半個鐘內都唔開車就開車撞佢。Erica報稱座駕當晚有損毁，希望警方拘捕涉嫌恐嚇刑毁嘅人。對於Erica嘅指控，蔣麗芸就話案件已進入司法程序，佢唔評論喇。


人力立法會議員陳志全噚日去差館陪Erica，話自己當晚都畀梁志祥架車擋住出唔到立法會，佢亦有報案，認為警方應該以同樣道理拉埋梁志祥。


另外，工黨張超雄就助理葉榮上周五衝擊立法會時，以輪椅撞向其中一道玻璃門，向公眾致歉。前日陪同東北團體開記招嘅張超雄話，願意助警方調查，又指葉榮暫毋須跟進新界東北議題。