CY民記5議員同枱

【明報專訊】特首梁振英噚日應立法會主席曾鈺成邀請，到立法會同議員食飯。不過，座位安排就惹起爭議，因為主家席除咗民建聯5個議員，一個其他黨派代表都無！民建聯副主席李慧琼話，係秘書處抽籤先至有呢個安排，佢話，只有民建聯坐到主家席，係「緣分加偶然」咁話。


李慧琼：緣分加偶然

秘書處話，一如以往，對外午宴安排，除咗立法會主席同指定委員會主席，議員嘉賓都係以抽籤方式安排入座。主家席除了CY、曾鈺成、立法會秘書長陳維安、環境局長黃錦星、行政署長蔡潔如、行會成員史美倫，就只有民建聯議員李慧琼、鍾樹根、陳克勤、葛珮帆同何俊賢。


5泛民議員報名 兩人現身

今次立法會請特首、行會成員、 政府高官食飯，原本只得5個泛民議員報名，最終出席嘅只有民主黨黃碧雲同公民黨郭家麒兩人。


工黨何秀蘭話，工黨唔係刻意杯葛，但政府咁野蠻，要工黨坐低同CY食飯都好辛苦。