紙熊貓夜探燒臘明哥

【明報專訊】宣揚保育嘅1600隻紙熊貓，繼早前去咗大嶼山參見大佛，噚日深宵浩浩蕩蕩，走入深水埗搵愛心爆棚嘅明哥，「佔領」咗北河燒臘飯店，佢哋爬晒上飯枱同櫈，呼籲市民珍惜食物。明哥見到咁多熊貓仔立即變成大細路，抱起佢哋影相，張張相都笑得好開心。


熊貓仔喺舖頭爬上爬落，有啲坐喺卡位、有啲坐喺飯枱，佢哋同明哥嘅合照噚日上傳到「1600熊貓」facebook專頁，隨即贏到唔少網民「like」，有網民大讚「明哥跟熊貓一樣可愛」，又話明哥好有「童真」。


有部分網民見熊貓佔領飯店，就諗起「佔中」，仲留言問「熊貓幾時佔領中環？」，又話「國寶先行佔領中環」！