團體開波 宣傳6．22投票

【明報專訊】世界盃今朝凌晨開波，學聯、學民思潮等10多個團體組成嘅「公民直接提名．必不可少」團體，噚日喺中環鬧市率先「開波」，呼籲市民喺6月20日至22日和平佔中全民投票中投「學界方案」一票，佢哋仲以波會友，以一記衝力射球射穿國務院《「一國兩制」在香港特別行政區的實踐》白皮書道具，話要幫市民「開路」爭取特首選舉平等方案。


衝力射球踢爛「白皮書」

學聯秘書長周永康就話，國務院白皮書將內地思維硬塞落香港，呼籲市民喺全民投票行出嚟，用手上一票表達對白皮書嘅不滿，佢哋會喺6月20日至22日期間，喺全港九新界設約50個街站宣傳。而公民黨郭家麒噚日就喺中環宣傳全民投票，仲拎埋一籮「爛橙」擺檔，教市民點揀橙，矛頭同樣係指向白皮書。


律政司長袁國強噚日又再現身為白皮書解畫，有傳媒用普通話問司長，白皮書對《基本法》正確實施和「港人治港」能起什麼作用，點知袁司長聽到用普通話問嘅問題，都用廣東話回答，唔通近期法律界嘅人都係鍾意用本土語言表達意見？