中海油開發廣西旅遊島

【明報專訊】廣西省潿洲島對港人嚟講可能陌生，其實佢係新近開發嘅旅遊島，島上有活火山口，亦有廣西特色嘅天主教堂，但原來連中海油（0883）湛江分公司，喺島上都有個重要基地，處理附近4個海上油田所開採嘅原油，製成成品油、天然氣、液化石油氣等產品出售，真係一個多元化嘅島嶼。


自設發電機組

小琴有幸到島上參觀中海油嘅設備，不過，聽中海油湛江分公司潿洲終端負責人廖宏越講，由於島上不時停電，廠房自設發電機組，更會喺有需要時向島上供電。據佢介紹，成品油嘅客戶唔少，天然氣則固定供畀新奧能源（2688）母公司新奧集團。


要去潿洲島，要先去廣西省嘅北海市然後坐船，但每日往返船隻相當少，中海油嗰4個海上油田，位處潿洲島西南方約30至60公里，離越南極近。小琴到達潿洲島嗰日，原本民用嘅碼頭就改為軍用，因此要到臨時碼頭上岸，而且在島上也咁啱見到海陸兩軍聯合訓練，據當地人講，以前很少看到，可能同近排局勢緊張有關。


[小琴密語]