古坑有隻花耳環

【明報專訊】沙中線土瓜灣站發現到宋元時期嘅遺址，仲有幾千件文物，Emily就聽聞，早前有工作人員甚至喺個宋代土坑之中，搵到一隻好靚嘅花形耳環（圖）。正當Emily諗緊，呢隻「坑底之花」唔通來自宋代之際，立法會議員毛孟靜就喺facebook透露，原來隻耳環係佢嘅！


Miss Mo話，上星期佢同一班立法會議員去沙中線地盤參觀時，戴住頭盔整緊下巴條索帶，點知隻耳環跌咗落地，之後一路碌、一路碌，就碌咗落個坑度。隻耳環係佢大約10年前喺印尼買嘅，Miss Mo話唔算貴，加上只係佢自己唔小心，本來諗住放棄唔執番㗎喇，點知第二日考古隊成員Raymond幫佢喺坑底執番，Miss Mo不忘喺facebook多謝佢。