紙熊貓參見大佛

【明報專訊】宣揚保育同創意嘅1600隻紙熊貓到港之後，一舉一動都惹人注意，佢哋噚日朝早就去咗大嶼山，喺268級石階上面參見天壇大佛，場面可愛又壯觀。熊貓之後轉場去馬灣「快閃」，主辦方本身公布時段係由中午12點至下晝3點，不過有網友話下晝兩點半趕到，發現啲熊貓已經唔見晒，唔少網友喺「1600熊貓遊」facebook大鬧安排不周。主辦方就解釋因為有義工中暑，所以先提早結束活動。


有義工中暑 提早完結

雖然講明有義工中暑，但唔少網友仍唔滿意，有網友話同一家大細專程入馬灣睇熊貓，點知失望而回；不過亦有網民覺得熊貓最後點都會去中環PMQ元創方展出，叫大家唔好心急，若扶老攜幼嘅可以等到月尾先去欣賞展覽。熊貓下一次預先公布嘅「快閃」時間，係今個星期六（6月14日）下晝1點至4點鐘，地點尖沙嘴鐘樓，有興趣市民留意喇。