長毛變短毛 馬丁要覆核

【明報專訊】社民連主席梁國雄（長毛）因3年前喺科學館衝擊遞補機制論壇，前日被裁定違反《公安條例》罪成，須即時入獄4星期，前晚入荔枝角羈留所，長毛嘅「長髮」存留頓成關注。民主黨何俊仁噚日同Emily講，原來佢前晚準備向法庭申請禁制令，禁止「長毛被剪」，可惜何俊仁喺晚上近9點先搞，但長毛髮已落，為時已晚。


何俊仁趕唔切「刀下留髮」

根據《監獄規則》，任何人被判入獄後，都要服從懲教人員有關清潔指示，洗澡、剃鬚及剪髮，不過長毛代表律師、資深大律師李柱銘（馬丁）話，會就長毛喺獄中被迫剪短頭髮一事提出司法覆核（JR），原因係只有男犯人先要被剪短頭髮，但女犯人可豁免，並不公平。連坐監都不忘JR，長毛司法「覆核之王」嘅地位果然並非浪得虛名。


其實，長毛以前包括2000年及2002年入獄時，亦曾經變咗「短毛」。長毛噚日剪咗短髮上庭，有人話佢似藝人吳孟達，有人話佢似多啦A夢大雄嘅班主任，不過長毛支持者都異口同聲話，長毛頭髮雖然剪短，但鬥志不滅喎。不過，「保衛香港運動」發起人傅振中噚日喺facebook轉貼長毛被剪頭髮嘅新聞時，仲好狠咁話，請獄警除咗「剪佢條長毛」外，仲要「為全港紀律部隊」喺未來4星期內「把這死狗『去勢』 ，仲要『通』得徹底啲」。