智能鋼龍 美斯射12次先入

【明報專訊】世界盃後晚開鑼！有商場最近喺德國引入咗一部號稱能撲救九成射門嘅人工智能鋼門系統，畀市民一試身手，技術人員話，連阿根廷球星美斯都要射咗12次先至破門，但有一個年輕美女就一射破網，反映過關要講方法，速度及蠻力「永不能戰勝鋼門」。


兩部鏡頭追蹤足球

智能鋼龍門「Robokeeper」主要靠兩部每秒能拍攝90格影像嘅鏡頭追蹤足球動向，電腦會分析影像，再操控兩米高嘅「守門員」撲救射門，守門員起步速道比一級方程式賽車起步速度快17倍，反應時間亦比人類守門員快一半。


技術主管Till Bernau曾伴隨鋼門遊世界，接觸多名挑戰鋼門嘅球星，佢都認為不論世界級球星定係4歲細路哥，要射破鋼門只有「兩個方法」，掌握唔到就「永不能破門」。但佢就唔肯講邊兩個方法！


技術員讚美斯友善好波

見過美斯挑戰鋼門嘅Till大讚美斯友善又好波，但即使美斯唔起跑射門球速都有每小時125公里，都要挑戰12次先射入，因為美斯「到第12次先搵啱方法」。鋼門後日起至6月26日喺愉景新城展出，喺商場內消費夠一定金額就可以試玩3次。