快閃紙熊貓「可領養」

【明報專訊】1600隻紙熊貓噚日正式展開巡迴香港快閃之旅！喺「熊貓爸爸」法國藝術家Paulo Grangeon帶領下，一眾紙熊貓噚日率先喺機場現身，今日起至本月21日會分批游走全港12個景點。Emily仲聽講，本月25號起，市民可以用200元至450元，網上申請「領養」呢批熊貓，有6個款式同3個尺碼揀，全部收益會撥捐WWF香港分會作保育同教育用途，詳情可瀏覽1600pandashk.com/zh/adoption。


200至450蚊 捐畀WWF

熊貓出巡，主辦單位仲先公布其中幾個景點出沒時間，例如今日會去天壇大佛同馬灣、周六下午就會去尖沙嘴鐘樓，下周四至六就會到維園同皇后像廣場，每個景點只會留兩三個鐘，至於其餘景點，有米埔、馬場、旺角西洋菜街同海洋公園，但主辦單位就賣關子唔講佢哋幾時出沒，話「有緣人」就會撞到喎。


Emily噚日喺機場睇到呢批熊貓有圍欄隔住，即使佢哋之後會「包廂」坐天星小輪同電車，市民都係只可遠觀唔可以近距離接觸。主辦單位話，當紙熊貓本月25號返到終點站中環PMQ元創方後，到時就會有個區域畀市民近距離親近熊貓。一旦落大雨，會更改或取消原定行程，所以熊貓迷要留意佢哋嘅fb專頁（facebook.com/1600Pandas）發布嘅最新消息。