愉景新城大翻新 街坊驚變海怡翻版

【明報專訊】早前一眾南區海怡半島居民，擔心海怡西商場翻新後會轉型成為名牌特賣場；同樣正經歷大翻新嘅荃灣愉景新城商場，街坊憂慮商場會變「海怡翻版」。有街坊早前同立法會議員田北辰（田二少）反映，話新安排下，大眾化食肆數目減少、兒童教育機構搬走，連洗衣店都貴咗，仲要無得磅洗。二少就話已親自同新世界發展高層接觸，相信呢度唔會變成「海怡翻版」，亦相信可以平衡番食肆同教育機構嘅比例，服務到街坊。


商場：引入多元化商戶

愉景新城購物商場發言人話，商場正做翻新優化工程，會積極考慮引入多元化嘅商戶，亦會不時聆聽居民需要。二少話建議唔同嘅教育範疇、唔同種類食肆，最好每款保留一種，喺發展同居民需要之間取個平衡。