觀塘新市集 檔販呻生意麻麻

【明報專訊】觀塘重建後逐漸變天，市建局話過可以「無縫交接」安置協和街及物華街市集119個檔販、位於同仁街嘅臨時市集（即前觀塘政府合署位置），啟用日期由3月拖到5月中先畀檔販試用，直至噚日終於正式舉行開幕儀式，邀請咗建制派立法會議員謝偉俊、陳鑑林、黃國健出席剪綵，以及當日承諾「無縫交接」安置嘅市建局觀塘項目總監李樹榮出席，但就唔係個個檔販都領佢哋情。有檔販仲話建制派議員喺搬遷期間無幫過佢哋，今次走嚟完全係「做騷」。


喺舊市集堅守到最後一刻、賣內衣褲嘅檔販李淑賢（肥妹）話，上月16號搬入試業後已經開檔3星期，但新市集人流好少，「係得星期六、日多少少人，試過平日下晝無人行，生意同舊市集無得比」。肥妹話試過最差一日得百幾蚊生意，最多嗰日都係幾百蚊，不及喺街市附近嘅舊市集。


嫌太焗嚇走市民

除咗人流少，新市集通風亦麻麻，肥妹話入面無乜風扇，又無對流風，最熱有成37℃至38℃，「上個禮拜日日好天時入面真係好焗，啲人點會有心機行」。肥妹希望市建局之後可以加強宣傳同增加通風，令生意有啲起色啦。