黃洋達圍剿 李卓人反攻

【明報專訊】平日港台嘅節目《城市論壇》，有「維園阿伯」指罵民主派嘉賓導致混亂情况已經係家常便飯，不過，噚日就上演大混戰，七國咁亂。先有「保衛香港運動」傅振中同成員抗議港台立場偏頗；後來「熱血公民」黃洋達同20個成員，不論台上台下都圍剿支聯會主席李卓人，李卓人離開時更被數十個熱血公民成員指罵「勾結共產黨」，李卓人要喺10多名警員護送下離開。


熱血公民大聲過維伯

城市論壇噚日主題係討論六四事件應否扣連香港政改同佔中議題。黃洋達喺台上不繼攻擊李卓人，又插嘴唔畀阿人回應，搞到主持謝志峰都忍唔住話「你可唔可以收聲呀」。黃洋達又喺節目期間帶領成員叫口號，聲浪較維園阿伯有過之而無不及。


黃洋達批評支聯會舉行六四晚會只係單純悼念，不滿支聯會無結合抗爭，話自己有實際行動去打倒共產黨。不過，主持人問佢有咩實際行動咁巴閉？黃洋達就話「當大家感覺共產黨要倒台，唔到佢唔倒」。


阿人聲嘶力竭回應，強調六四燭光集會不止係記憶，又反駁指支聯會有實際行動，有去中聯辦示威、建立永久六四紀念館，質問黃洋達，「你去廣東道嗌兩句口號，你咁就叫有行動呀？」

李卓人被黃洋達攻擊，另一嘉賓「香港本土」成員、公民黨立法會議員毛孟靜雖然都有幫吓口，叫黃洋達唔應該批評支聯會，但轉過頭佢自己都踩多一腳，話唔同意支聯會所講內地維權運動，同香港爭取民主運動必須互相配合同並行。