尋藥房前身 出動Google Map

【明報專訊】人口政策關注組噚日公布一份荃灣藥房調查，顯示2011年起區內藥房由10間增加一倍至21間，有8間本地小店倒閉。調查集中於荃灣區川龍街、眾安街及沙嘴道一帶，關注組發言人譚凱邦話，區內近年增設咗唔少直通巴士總站，相信因此令自由行增多，而藥房數量亦隨即增加。佢批評香港零售管理協會委員多為連鎖店集團，直接得益於自由行，不能為中小企發聲。


CD舖變藥房 譚凱邦不捨

Emily問起荃灣30幾年嘅街坊譚凱邦，如何了解小店執笠變藥房嘅統計方法，佢話以親身觀察同Google Map街景圖不同時段變遷整合得出。Emily無諗過Google Map都畀佢用埋，算係善用科技，但統計精準與否就見仁見智啦。譚凱邦呢個街坊亦講到，最唔捨得就係間開業十幾年嘅CD舖近年都關門大吉，舖面亦轉做藥房。