漁護署被指「屈」雪橇犬 狗主抗議

【明報專訊】有愛狗人士向Emily投訴，話漁護署「冤枉」雪橇犬，噚日特登帶埋愛犬去長沙灣政府合署抗議。夏日炎炎，30幾個人同6隻狗齊齊出動，對於怕熱嘅雪橇犬嚟講都咪話唔辛苦，何解咁嬲呢？


派新傳單 教危險狗規例

有份去請願嘅元朗區議員鄺俊宇（Roy）同Emily講，原來漁護署最近印咗份《有關危險狗隻規例的知識》嘅新傳單，已經喺各大屋苑派通街，傳單用咗雪撬犬做封面，但雪橇犬唔係鬥犬，對人無攻擊性，唔屬於「危險狗隻」，大家認為咁做好容易誤導市民，所以噚日愛犬組織「香港雪橇犬Husky基地」就同Roy去咗請願，要漁護署撤回單張。


漁護署回覆Emily話，用雪橇犬張相係因為佢係本港較常見嘅大型犬，根據漁護署紀錄，現有持牌狗入面，有百幾隻雪橇犬曾經涉及咬人個案，比率喺受規管嘅大型犬當中排行前10位。 不過發言人話，為免引起誤會，已經停止派發傳單，同埋移除喺網頁嘅資料嘞。