謝偉俊划獨木舟 觀塘去郵輪碼頭

【明報專訊】立法會發展事務委員會日前否決九龍東高架單軌鐵路項目嘅詳細研究撥款申請，呢條鐵路原本由觀塘港鐵站、經觀塘碼頭，再以高架橋搭過去郵輪碼頭，但如今胎死腹中。循九龍東出選嘅立法會議員謝偉俊質疑若觀塘同郵輪碼頭完全無連接，要兜一大個圈先至能夠互通太唔似樣，計劃下個月19號由觀塘碼頭划獨木舟去郵輪碼頭，爭取以浮橋連接兩地。


九東鐵路難產 爭浮橋連兩地

政府早前估計呢條單軌鐵路造價達120億。阿Paul就話，就算真係建造高架單軌鐵路，最快都要2025年先至能夠投入服務。即使用另一方法、電車公司起現代化電車系統嘅建議，都要3到5年先至落成。阿Paul認為，幾百萬起一條浮橋先連接兩地化算，用浮橋先頂住檔，最多可用十年八年。


為顯示兩條路線相差幾多時間，阿Paul邀請友好嘅區議員，喺佢划獨木舟期間踩單車經另一條路線由觀塘去郵輪碼頭，途經九龍灣，阿Paul話原本諗住游水，但見到啲水咁污糟，無辦法唔打消呢個念頭。