團體上繳 支聯進帳10多萬

【明報專訊】前日有多個政團趁六四晚會，喺銅鑼灣同天后附近擺街站籌款。公民黨、學民思潮同人民力量計劃跟「江湖規矩」上繳一成款項畀支聯會，民主黨就會全數捐出。換言之，支聯會大約會多10多萬元捐款。而學民思潮亦繼元旦遊行後，再度榮登「吸金王」，一日內籌到37萬，比元旦遊行多近5萬。


學民再膺吸金王

雖然支聯會主席李卓人話無規定其他團體籌款要上繳支聯會，不過各大政團都打算根據民陣訂出嘅「江湖規矩」，上繳一成款項支持支聯會工作。民主黨前日喺會場售賣六四T恤，副主席羅健熙話全日約有6萬蚊營業額，扣除成本，會將近3萬蚊嘅盈利全數捐畀支聯會。公民黨籌到21萬，都打算上繳一成。


至於日前講過話要「食窮支聯會」嘅人民力量，執委劉嘉鴻話未有時間點算籌到幾多錢，強調會上繳部分款項畀支聯會，但只限於喺維園內人力攤位籌得嘅款項，至於銅鑼灣街站所得嘅就唔會上繳喇。