王國興又批拉布

【明報專訊】立法會噚日終於三讀通過《財政預算案》，不過，喺三讀表決前，建制派同拉布議員不惜「最終一戰」，主席曾鈺成變成「磨心」。當中工聯會王國興質疑今年拉布「浪費」咗立法會約3570萬元，又話計埋上次拉布浪費嘅歷史紀錄，下年就會超過1億，批評曾鈺成係「1億主席」。


「興哥」噚日圖文並茂，帶埋布景板計數，話據佢估計，因今次拉布已浪費嘅公帑達3570萬元，相當於230萬罐午餐肉，或170萬罐豆豉鯪魚。佢仲作埋新詩，批評拉布議員係「千萬議員」。佢又批評主席早前讚揚拉布議員，係喺盡忠職守議員嘅傷口上灑鹽。


王講錯「候群症」 主席糾正

人力陳偉業發言時就話，感覺到王國興開始有啲精神錯亂，勸佢去睇精神科醫生，避免危險，甚至自我毁滅。公專聯梁繼昌話，只要地球繼續存在，公帑照樣要花，議員都係要出糧，唔明白王國興點解會得出拉布議員浪費公帑嘅結論。曾鈺成亦「不失霸氣」，喺其中一次興哥批評佢時，捉到興哥將「斯德哥爾摩症候群」，講錯咗做「候群症」，最終先壓得住個場。