新聞類別
港聞
詳情#
【明報專訊】唔少政黨同民間團體會喺六四晚會乘機擺街站籌款，無他，都係貪六四晚會人數多，每人捐少少錢，收入都相當可觀。Emily噚日撞到人民力量譚得志（快咇）時，佢就同Emily講，佢哋要籌錢，而維園人流多，啱晒佢哋擺檔籌錢同宣傳6•22全民投票，不過佢就要努力籌錢，唔會參加支聯會六四晚會活動，仲話要「食窮支聯會、票投人力」。
會否上繳支聯「應無問題」
至於籌到嘅錢會否上繳部分畀支聯會？快咇就話應該無問題嘅，因為支聯會始終唔係民建聯。
其實，部分政黨會將當晚籌得款項一成金額上繳支聯會，民主黨今年仲話會將全部捐款支援支聯會活動。不過，最後有幾多團體有認真上繳款項，真係要支聯會先知。
新同盟諗住落雨賣遮
噚日銅鑼灣港鐵站出口至維園有唔少團體擺街站，要「吸金」亦只好各出奇招。Emily發現，唔知係咪呢排吹起「文青風」，唔少團體都有賣新書，好似華人民主書院就擺賣兩本前學運領袖王丹嘅新書，其中一本叫王丹facebook精選輯，顧名思義，即係將王丹facebook較多迴響嘅一啲動態集結成書，每本售價120元。至於新民主同盟噚日就賣遮，諗住晚會會落雨啦，點知一滴雨都無，唔知係好彩定唔好彩呢？
留言 (0)
