泛民默哀 張華峰烏龍留下：反思都好

【明報專訊】立法會繼續審議財政預算案，身兼支聯會主席嘅工黨議員李卓人，噚日一早就邀請全體議員為六四死難者默哀1分鐘，但立法會主席曾鈺成話，立法會對默哀有清楚規定，李卓人嘅要求唔屬該會慣例，所以唔批准，曾鈺成最後宣布暫停會議，泛民議員就留喺會議廳內繼續默哀。


不過，建制派就出咗小烏龍，經民聯張華峰因為事前無被通知，又坐第一行，「唔小心被留咗」喺會議廳。張老闆事後話，件事反思吓都係好嘅，但佢聽到李卓人話要結束一黨專政，覺得唔啱聽，就行番出嚟。


陳維安深藍呔 無回應意思

另外，好多泛民議員都一身黑衣，立法會秘書長陳維安噚日更加打咗條深藍色嘅呔，問番陳維安，佢話屋企有好多唔同顏色嘅呔，無回應打深藍色呔係咪有特別意思。


噚晚好多人悼念六四，Emily問特首辦，特首會唔會向中央反映維園市民意見，特首辦話梁振英講咗唔會再回應事件。發展局長陳茂波就話，當年做立法會議員，喺2009年立法會辯論時，已經就事件表達個人立場和講法，唔會再補充。翻查資料，時任會計界議員陳茂波話六四事件令海內外中國人最痛心，人民政府用槍彈對付手無寸鐵嘅學生，佢支持毋忘六四，但因未能掌握全部事實，暫難以說平反，而佢當年有喺立法會為六四死難者默哀。