馬會放榜 唐唐又抽中馬

【明報專訊】全國政協常委唐英年對賽馬一向有研究，早前被唐媽媽唐尤淑圻踢爆佢11歲就識睇馬，噚日馬會「放榜」，公布最新馬匹進口許可證中籤名單，唐唐繼上年抽中馬後，今次又中標，抽中自購新馬。


馬會噚日公布最新馬匹進口許可證嘅中籤名單，今次馬會發出180份自購新馬及150份自購馬（PP）進口許可證。前馬會主席夏佳理同前馬會董事榮智健繼續中籤，菁英會創會主席施榮忻亦都中籤。


團體方面，鄉議局抽中一隻團體馬，同樣係自購新馬；思捷環球主席柯清輝都抽中自購馬。至於去年有中籤嘅自由黨黨魁田北俊，今年同太太入紙抽馬，雖然抽唔中，但就入圍候補名單。