明報奪兩獎

【明報專訊】消委會公布2013年消費權益新聞報道獎結果，《明報》有兩個系列報道分別獲得新聞組銀獎、銅獎。銀獎得主係〈防搵笨新例〉系列報道，由港聞一般組記者周婷、錢瑋琪、田青青負責，揭發超市、美容院及補習社嘅標價方式同銷售手法，可能觸犯上年7月生效嘅新修訂《商品說明條例》，例如兩大超市分別標榜「至抵價」但無根據，賣豬肉又有特價、無原價。報道刊出後，呢啲不盡不實嘅聲稱統統無得留低。


至於獲得銅獎嘅係〈奶粉荒「天價奶粉」〉系列報道，記者上年12月「放蛇」揭發有藥房用584元賣原價294元嘅奶粉，抬價劣行惹來民憤，藥房由初時唔認，到公布放蛇錄音聲帶之後至肯道歉，總算幫消費者討回公道，負責嘅記者包括港聞一般組邱雅錡、梁杏怡、黃熙麗、田青青、周婷、陳穎欣。Emily喺呢度恭喜咁多位同事，希望大家再接再厲﹗