「救」佔中者 正義聯盟糾察隊成立

【明報專訊】反佔中團體「正義聯盟」噚日喺旺角麥花臣球場舉行糾察救傷隊宣誓儀式，宣布成立一隊有超過200人嘅救傷隊喺佔中期間救急扶危。作為反佔中嘅中堅，召集人李偲嫣話救傷隊主打照顧參與佔中而受傷嘅人，強調「無矛盾」，因為會同時勸佢哋離開，佢話即使過程和平，都會在旁守候，「唔會離開佢哋」。不過，Emily記得和平佔中已有一隊專業醫療服務隊，有近20名醫護成員。


救傷隊照顧兼勸喻離開

噚日有約50個支持者出席活動，包括經民聯立法會議員梁美芬，被問到會唔會加入糾察隊，梁美芬話「民間會做」，佢話少啲政治力量干擾會好啲，但會為正義聯盟提供法律意見。儀式中，梁美芬與李偲嫣一齊對住個象徵「佔中玩火」、綁滿紅色紙條風扇「發功」，要冚熄佔中團火咁話。


李偲嫣話已有多個退休警員、消防員同海關主動成為義工，將為糾察隊提供救傷同情緒輔導培訓。噚日就即場發生一個涉及情緒控制嘅「實戰課」，話說現場有《蘋果日報》攝記採訪，引來李偲嫣同支持者不滿，李以手擋鏡頭阻止採訪，其間有支持者高聲大罵攝記，最後攝記喺近10個正義聯盟成員同支持者「護送」下離開。