馬萬祺遺體專機運返澳門

【明報專訊】前全國政協副主席馬萬祺病逝，享年95歲，遺體噚日由中國國際航空公司用專機由北京運返澳門，靈柩蓋上五星國旗，規格同2006年前全國政協副主席霍英東一樣，都係專機運送靈柩。澳門已成立馬萬祺治喪委員會，星期日（6月1日）朝早9點喺澳門綜藝館舉行一個半鐘嘅公祭儀式。


遺體運返澳時，澳門特首崔世安（圖C，前排右二起）、全國政協副主席何厚鏵、澳門中聯辦主任李剛，與馬萬祺嘅親屬喺機場肅立迎候。機艙打開，馬萬祺長孫馬志剛手捧其遺像走落弦梯，靈柩由傳送帶運到地面，多名澳門警察抬着靈柩到靈車上駛離機場（圖D），送到鏡湖殯儀館。


霍英東離世時都係以國葬規格舉殯，專機運送蓋上國旗嘅靈柩到香港，由警隊儀仗隊扶靈柩到靈車上面。